Nyuma y’aho mu Rwanda hagejejwe inkingo zinyuranye ndetse kuwa gatanu tariki 5 Werurwe 2021 gahunda yo gukingira Coronavirus itangijwe ku mugaragaro na Minisitiri w’ubuzima Dr Ngamije Daniel, hakaba hakomeje gukingirwa ibyiciro binyuranye, kuri uyu munsi hatahiwe abagororwa.
Ni muri urwo rwegor mu gitondo cyo kuri uyu wa Kabiri tariki 09 Werurwe 2021, Urwego rw’Igihugu rushinzwe imfungwa n’abagororwa (RCS) hamwe n’Ikigo gishinzwe Ubuzima (RBC), bazindukiye mu gikorwa cyo gukingira Covid-19 abari muri gereza ya Nyarugenge ahazwi nk’i Mageragere.
Iki kigo cy’imfungwa n’abagororwa cyashimangiye ko iki gikorwa cyo gukingira Coronavirus gihera ku bantu bakuze guhera ku bafite imyaka 60 kuko ari bo bihutirwa cyane ndetse n’abafite uburwayi butuma umubiri wabo uba udafite ubudahangarwa buhagije dore ko ari bo icyorezo cya Covid-19 kigeraho kikabashegesha abo kidahitanye kikabasigira ingaruka zitari nke.
Kuri uyu munsi wa Gatanu wo gutanga inkingo za COVID-19, hanakingiwe kandi abakora umwuga wo gutwara abantu kuri moto (abamotari), abakora mu Rwego rwunganira Uturere mu mby’umutekano (DASSO), n’abandi.
Abahawe inkingo bose uyu munsi bavuga ko bishimiye kuba Leta yabazirikanye nka bamwe bari mu matsinda arusha abandi ibyago byo kwandura.
Ejo hashize kuwa Mbere tariki 8 Werurwe 2021, mu Gihugu hose abantu 10,224 bakingiwe icyorezo cya COVID-19, bituma mu minsi ine mu Rwanda habarurwa abamaze gukingirwa barenga 210,000.
Minisiteri y’Ubuzima itangaza ko igikorwa cyo gukingira kizakomeza gukorwa mu Gihugu kugeza mu mwaka wa 2020 ubwo hazaba hamaze gukingirwa nibura 60% by’abaturarwanda basaga miliyoni 12.
NIKUZE NKUSI Diane
